گئنه آرغين گئنه يورغون گئنه بير غملي اؤره ك

 يارالي قوش كيمي چيرپينمادادير

گينه نيسگيلي اؤره ك يانمادادير

كؤز گؤز اوسته قالانير نئيله مه لي

آليشير دالغالانير نئيله مه لي

سرمي نه آتا بيلدي نه آنا

گئديرم چله خانا-چله خانا

من گرك يار يانان اودلاردا يانام

يار دئيب يار دولانام

نه روا عشقي دانام-من باها نغمه سيم

 نغمه آديم -گلميشم عشق زليخا ياراديم

هاني ليلي-هاتني شيرين

قويام خسرتلي باشي ديزلرينه

بي باخام غمله دولان گؤزلرينه

دئيم عاشيق اودي اودلاردا يانا-

ننه دئيم چله خانا-چله خانا

 گئديرم دونيا بويو داردي منه

يانماسام عشق اودونا عاردي منه

آجيميش عشقي شيرين لشديره ره م

آيري دوشموش ائلي بيرلشديره ره م

داغيت اؤلكمده ديسين قوشلاريميز

اوخشاسينلار بيزي تاي توشلاريميز

قوي ديريلسين اؤلن احساسلاريميز

من او غفلت جاداسين تاژلاماديم

يانميان لامژا كيمي لاپلاماديم

نازلي يار گئدي اياق ساخلاماديم

يار ائشيكدن اؤزون اودلانديردي

من ايچيم ياندي مني ياندردي

سانما نغمه ال آياق چالمادادير

يارين عشقي جانيمي آلمادادير

عشق سلطاني فرج وئرسه بيزه

سئل اولوب گؤز ياشي دؤنمز دنيزه

شيشه عمري چاليب سينديرارام

عشق اوتوندا اؤزومي يانديرارام

دولدوروب كاسه صبري جالارام

چيخارام داغلارا هاي هاي سالارام

نازلي يار گئتسه نه جور تك قالارام

ايسته يير باشيمه دنيا دولانا

گئديرم چيله خانا- چيله خانا

وامقين جاندان گئچن عذراسي يام

من يانان مجنونيمين ليلاسي يام

نغمه والاسي يام عاشق شيداسيام

عشقيده فرهاد وشيرينن باشام

اصلي يه عشق عالمينده يولداشام

كيم بوكر دونيا باغين باغچاسينا

كيم بوكر عشقي عاقيل بوغچاسينا

سانما يين عشق اؤلوبدير ديريدي

نغمه عاشيق سيراسينان بيريدي

تاپارام عشقيمي هر يئر ده اولا

قويمارام تك دولانيب رنگي سولا

ايندي كي گئتمه لي يم هر نه اولا

عشق دريادي عاقيل قطره سيدي

نغمه نين سون سسي عاشيق سسي دي

منه دونياده ااشز عشقيم بسيدي

سؤيله مندن گنه بير غملي سلام

سئوديگيمنن مني آيري سالانا

گئديرم چله خانا- چيله خانا

سن آغير داغ كيمي داغلار باشيسان

بير عوموردور سينه ده غم داشيسان

سن كي زنگانيلارين يولداشيسان

بير چيغير بلكه ياتانلار اويانا

گئديرم چله خانا-چله خانا

«نسيمي» نين قاني يام

منه حقارتيلن باخمايين ، غزل كاني يام ،

واراق – واراق داغيلان ائلده ، شعر ديواني يام ،

منيم ويقاريمي گئت ، چيلله خانه دن خبر آل ،

اخي فرج كيمي يم ، منده عشق سولطاني يام ،

ياشيل چمنده بيتن ، سينه داغلي بير لا لايام ،

«فضولي» نغمه سي يم من ، «نسيمي» نين قاني يام ،

اولار كي عاشق دلخسته دير ، تانيللا مني ،

بو اؤلكه ده اؤلن عاشيقلرين ، چيخان جاني يام ،

آري كيمي دولانين گوللر اوسته ، بار گتيرين ،

آنام ديلي شيره دير ، من او شيره نين شاني يام ،

بو فخردير منه توركو ائليمدي  ، توركو ديليم ،

منم بسيمدي فقط ، سهرورديني تاني يام ،

بير حقي باتميش ائلين سينه داغلي شاعيري يم ،

غزلچي « جعفري » يم ، اؤلكه مين آدي ساني يام ،

شاعير:اوستاد هوشنگ جعفري

گؤنده ر     بؤلوم لر: شعرلر