سهند 1346نجي ايلين بهمن آييندا شهرياري گورمك اوچون تهراندان تبريزه گليرآمما شهريار كي بو ايللر دونيادان ال اوزوب و اؤز ائويندن ائشيكه چيخميردي سهندي گؤرمك ايستمير . آمما شهرياري گورمك شوقي سهندي مجبور ائدير اؤز آنا ديلينده شهريارا مكتوب شعريني يازيب شهريارا گوندرسين،و بو مكتوب “سهنديه” اثرينين يارانماسينا باعث اولور.
بو آزادايغا حسرت قالان دويغولو و دويوشجول شاعير 1358 نجي ايلين فروردين آيينين22نده دونيادان گئدير و اونون وطن عشقينه دويونن اورگي دؤيونمكدن دايانير و بوتون حق سئون انسانلاري ماتمه بورويور. اونون روحو شاد و يولو داواملي اولسون.
من دئميرم اوستون نژاددانام من
دئميرم ائللريم ائللردن باشدير
منيم مسلكيمده ، منيم يولومدا
ملت لر هاميسي دوستدور قارداشدير
چاپماق ايسته ميرم من هئچ ميللتي
نه ديلين، نه يوردون ،نه ده امگين
تحقيرائله ميرم ،هدله ميرم
كئچميشين، ايندي سين ، يا گلجگين
من آييرميرام، آيري سالميرام
قارداشي قارداشدان ، آروادي ـ اردن
آناني بالادان، اتي ديرناقدان
اوره گي ـ اوره كدن، قانادي پردن
پوزماق ايسته ميرم من بيرليكلري
انسانليق بيرليگي ايده آليم دير
قارداشليق، يولداشليق ، ادبي باريش
دونيادا ان بويوك آرزولاريمدير
آنجاق بيرسوزوم وار، من ده انسانام
ديليم وار،خلقيم وار،يوردوم يووام وار
يئردن چيخماميشام گوبه لك كيمي
آدامام،حقيم وار،ائليم اوبام وار
قول يارانماميشام،ياراناندا من
هئچ كسه اولمارام ،نه قول،نه اسير
قورتولوش عصريدير انسانا بو عصر
اسير اولانلاردا بوخوون كسير
بوز چيچگي
گلدي چپيش كيمي شن، شيطان، ورهوو
نازلانا- نازلانا اوزومه باخدي.
الده نئچه پوتا بوز چيچگي، او-
گوللري هوسلن گولدانا تاخدي.
«بونلاري يادگار ساخلارسان مندن»
دييه-گؤيرچين تك پيرلادي، گئتدي.
غمزه‌سي اوخ كيمي دگدي سينم دن،
اوو ايكن اووچوسون اوولادي، گئتدي.
گولداندا پوتالار قالدي بير زامان
گوللري قورودو، تؤكولدو بير- بير
منيمسه ايچيمي دوغرادي هجران:
«بونازين، ادانين معناسي نه دير؟»
مني بير دفعه ليك آتيردي اگر ،
گئدنده گول نييه وئردي ياديگار ؟
بيلميردي ، بيلميردي ، بيلميردي ، مگر ،
گول نه قدر عؤمر ائدر ، نه قدر ياشار !
اونا سؤيلمديم ، دئمديم ندن :
دريلن چيچكدن ياديگاراولماز ،
يوزده گؤزتلسن ، يوزده سو وئرسن ،
كؤكوندن آيريلان سارالار قالماز !
نه بيليم بلكه ده او آج مارالين ،
گوماني بو گوله گليرميش تكجه ،
بير ده يارامازا نه يارجي – يارين ؟
صاباحين معناسين بيله ايدي نئجه ؟
صاباح سيز كئچميشدي عؤمرو هميشه ،
كدرلر عؤمورلوك ، سئوينجلر بير آن ،
صاباحدان نه اوموب كوسجكدي نه ،
سحري سيخينتي آخشامي حيرمان ،
او، سئللر اوزونده اوزن بير كولون،
پوتاسيندا آچان گوله بنزردي.
هر آن بو دهشتلي طالعين، يولون،
داشلي دالغالاري باغرين ازردي.
او، سرت قايالارين قوزو جيراني،
قورشونلو، پيچاقلي شهرده دوستاق.
بير قارين منتلي چؤرك قرباني،
هر گئجه بير قوردون ائوينده قوناق.
ياردا- ياراشيقدا پريلر كيمين،
پئشه‌سي ياراماز ديولره خدمت
قوينو بخته‌ورليك اوجاغي لاكن
نصيبي قارا گون، قسمتي حسرت.
عشقه، محبته سوسوز اورگي،
گاه ايكييه باغلي گاه، اوچه باغلي،
اميدي، آرزيسي، عشقي، ديلگي،
بيلمز نه‌يه باغلي، لاپ هئچه باغلي.
شنليكلر، شادليقلار، دئييش- گولوشلر،
اونا بير اؤتري سازاق كيمي ايدي.
ييخيق اورگينده، سئوگي، سئويشلر،
آنجاق بير گئجه‌ليك قوناق كيمي ايدي.
نئجه كي ، قلبيندن چيخارتدي ، آتدي ،
بورانلي گئجه ده باش آلدي گئتدي ،
غوبارلي كونلوندن طوفان قوپارتدي
دومانلار ايچينده ايتدي كي ، ايتدي ،
بير زامان دالينجا دولانديم خسته،
يئره- گؤيه زنجير سالديم، تاپماديم.
آختارديم، قويماديم داشي داش اوسته،
هر ياندان سوراغين آلديم، تاپماديم.
گون كئچدي، آي كئچدي، ايلده دولاندي،
غميني كؤنلومدن آتا بيلمه‌ديم.
منيم‌ده سارامي سئللر آپاردي،
ندنسه اليندن توتا بيلمه‌ديم.
اؤزو ايتدي باتدي، دوماندا، چنده،
گولوده قورودو، تؤكولدو-اولسون،
غميني يادگار ساخلارام منده،
غم كي، چيچك دگيل سارالسين-سولسون.
اونودان دگيلم دردين، نيسگيلين،
سهند طاقتي وار منده ده قاللام.
شرينين اؤزوتك غمي‌ده شيرين
گئديبسه مهريمي غمينه ساللام.
2
دونن قار ياغيردي، باخديم، باغچا، باغ
سون يارپاقلاريني‌دا تؤكوب ساچميشدي.
يالينجيق پوتالار اسيردي زاغ- زاغ،
لاكن، بوز چيچگي چيچگ آچميشدي.
بير آندا ائله بيل عالم دگيشدي،
دومانلار دانيشدي، سس گلدي چندن.
ايچيمه سسلردن ولوله دوشدو،
«بونلاري يادگار ساخلارسان مندن»
يئنه يوماقلانان آرزيم، ديله‌گيم،
آچيلدي حسرته، غمه دولاشدي.
سازكيمي چاليندي يانان اوره‌گيم،
الهاميم فيشقيردي، نغمه‌لر داشدي.
بوز چيچگي منيم سئوگي چيچگيم،
آلقيش بو دؤزومه، ايلقارا آلقيش.
شاختايا، بورانا كيم دؤزرميش، كيم؟
سنده گؤر نه درين معنا وارايميش!
قيزين اورگيمين اودونا، قيزين،
سن منيم عشقيمين سون باهاريسان.
او گناهسيز قيزين، پناهسيز قيزين،
خزاندا گول آچان يادگاريسان.
سني اوره‌گيمه اكيرم باري،
كؤكسومده گؤك ساليب بوداق آتاسان.
ياغديقجا باشيما زمانه قاري،
هي چيچك آچاسان، چيچك آچاسان.
تهران ـ بهمن 1350
گؤزلــــر
يئنه كمان كيمي چكيب قاشلارين،
قولدور باخيشلاري واي مني گؤزلر.
داغيديب گؤنلومون باغچاسين، بارين،
ياخيب يانديرماغا خرمني گؤزلر.
اليندن كيم قاچدي جانين قورتاردي،
صنعان دينين آتدي، دونوز اوتاردي،
هر زامان يئني بير فتنه قوپاردي،
او گورجي باخيشلار، ارمني گؤزلر.
سوزگون باخيشيندان اوركلر شان ـ شان،
هر ياندا مين يانان ، مين ـ مين آليشان،
داغيديب تئللرين ائديب پريشان،
قلب ائوين ييخماغا شانه‌ني گؤزلر.
حسرتي لاله‌نين باغرين داغلاييب،
شوقوندان گول گولوب، بولود آغلاييب،
ييغيب داليسيندا دسته باغلاييب،
سونبولي، نرگيزي، سوسني گؤزلر.
زلفلري قاپ ـ قارا، اوزو آي پارا،
ناز ـ غمزه‌سيندن اوره‌كلر يارا،
قدرتدن چكيليب قاشلارا قارا،
نئيله‌يير ـ نئيله‌يير سورمه‌ني گؤزلر.
باخيشي، گولوشو، حيله‌سي، فندي،
قاتيب ـ قاتيشديريب پوسته‌ني ـ قندي،
بيلميرم ايلك ازل كيمدن اؤيرندي،
چمخمي، عشوه‌ني، غمزه‌ني گؤزلر.
سوردوم، شرمدندير، بويا نخوتدن،
باشيني قووزاييب باخماز ابدا.
دئديلر، اؤزو ايله دگيل، خلقتدن
شيوادان آليب بو شيوه‌ني گؤزلر.
عشقي، اوره‌گيمده تالان قوپاردي،
صبر و قراريمي چاپدي ـ آپاردي،
وورغون اولسايدي نه‌يه يازاردي
سهند بو قوشماني، نغمه‌ني، گؤزلر.
گؤنده ر
بؤلوم لر:
اجتماعي