عاشيق درويش؛ ائلين اونودولماز عاشيقي
گلمير قولاغيما او خوش آوازين
قاريشدي تورپاغا صؤحبتين سؤزون
يانيرام سنده كي كامالا درويش
اورميه‌نين آدليملاري كيتابيندان رحمتليك عاشيق «درويش»-ين ياشاميني اوخويوب قورتولاندان سونرا اوره‌ييمي غم باسيب اوره‌كدن آه چكديم. ندن بئلنچي بير اينسانلاريميز اونودولوبلار؟!! بونا گؤره ماراقلانديم عاشيقين كندينه گئديب، قبريني زيارت ائدم. يولداشلاريمين بيريله بو قونويو آرايا قويوب اونون كندينه گئتمه‌يي قرارا گتيرديك.
قراريميز جومه گونونه‌ايدي و زامانين اوچدوغونا گؤره بو گون تئزليكله گليب چاتدي، گون اورتادان سونرا «كوردلر» كندينه ساري يوللانديق. كند اورميه‌نين چيچست يولونون ۵ كيلومترلييينده‌ايدي. كنده يئتيشيب، اورادا ياشايانلاردان قبيرسانليغين يولونو سوروشدوق. نئچه دقيقه‌دن سونرا كنددن آزجا ائشيكده اولان قبيرسانليغا يئتيشديق. تورپاقلي بير يول و سسسيز بير آخيرت ائولري.. آخيرته قاووشانلارا بير فاتيحه وئرندن سونرا، تله‌سه‌رك تئز قبيرلري بير- بير آختاريب يازيلارينا دقت ائديرديك، آما رحمتليك درويش-ين قبيريني تاپا بيلمه‌ديك. اورالاردان كئچن بير چوباندان عاشيقين قبيريني سوروشدوق و كاشكي سوروشماسايديق!چوبان او كندين ياشايانلاريندان اولاراق عاشيقين قبيريني تانيميردي!!
نئيله‌مك دئمه عاشيق ائله اؤز كندينده‌ده غريب‌ايميش. گؤي‌ده بو غريبلييه دؤزه بيلمه‌ييردي و آغلاماق ايسته‌ييردي.. اومودلريميزي پوزماياراق، بيرينين يولدان كئچمه‌سيني گؤزله‌ييرديك. او آندا بير پيكان قبيرسانليغا ساري گلدي. دئمه تانري يئتيردي! بيزيم يانيميزا يئتيشنده اوندان عاشيقين قبيريني سوروشدوق و شوكورلر اولسون سوروجو قبيري تانييرميش و اونو بيزه گؤسته ره رك اؤزوده بيزيمله قبيرين يانينا گلدي، اللي ياشيندا اولان او معرفتلي بي بيزه حؤرمتله ياناشيب، عاشيقا فاتيحه گؤندرندن سونرا آزجا اونون ياشاميني بيزيم اوچون آچيقلادي و سورولاريما جاواب وئردي.
رحمتليك عاشيق درويشين قيساجا ياشاميندان بئله دئمك اولار:
عاشيق درويش فرهاد اوغلو ۱۳۰۹ – نجو گونش (شمسي) ايلينده اورميه‌نين «كوردلر» كندينده دونيايا گؤز آچميشدير. او ده‌يرلي اوستاد عاشيق فرهاد كيمي آذربايجانين سنتي موسيقي‌سينين آدليملاريندان ساييلير. عاشيق درويشين گؤزل، ايستي و صميمي سسينه گؤره عاشيق فرهادين شاگيردي اولموشدور. درويش چالان ساز سسي جانلارا كئچيب و گؤزل سسيله اونودولموش اثرلره جان باغيشلاييردي. بو اونودولماز اوستاد ۱۳۷۲ ـ نجي ايلين قويروق دوغان(مورداد) آيينين دوققوزوندا، گؤزلرين دونيايا يوموب، اؤز دوغوم يئري اولان «كوردلر» كندينده تورپاغا تاپشيريلدي. عاشيقين تشييع جنازه‌سينده ايينه سالماغا يئر يوخويموش و بو اونون خالق ايچينده نه قده‌ر سئويملي اولدوغونو گؤستريردي.
عاشيق درويش ياشام بويو (هميشه‌ليك) آذربايجانين سنتي موسيقي‌سيني سئورلرين اوره‌يينده قالاجاقدير و بو سس اورميه اوچون قالارگي بير سس اولوبدور. رحمتليك درويش ايرانين بوتون ميللي موسيقي فئستيواللارينا قاتيلب و يوكسك يئرلره ال تاپيب، اؤدول لر قازانيب‌دير. او نئچه ايللرده اورميه راديو، تلويزيونويلادا ايش بيرليگي آپاريبدير. او ده‌يرلي اوستاد چوخلو شاگيردلرده موسيقي دونياميزا تربيه ائديبدير. اونلاردان، عاشيق اسمعلي (اورميه – اونون بيرينجي شاگيردي)، عاشيق صبور شريفي (اورميه)، عاشيق عبدالله اشرفي (قورد تپه)، عاشيق ذكريا ملكي(قولونجو)، عاشيق رضا پوينده (سولدوز) و …آد آپارماق اولار.
عاشيق درويش، متين، ويقارلي و عاريف بير كيشي ايدي، دئمك اولار او خصلت ايله صنعت ده، اصيل و نمونه بير عاشيق و اوزان‌دير. رحمتليك درويش عاشيق صنعتينده اؤزونه مخصوص اولان نئچه هاوا ياديگار قويوب. اونلاردان «شكر يازي هاواسي» و «غربتي هاواسي»- ني آد آپارماق اولار. بو هاوالار اينديده اورمو عاشيقلارينين آراسيندا چالينماقدادير.
سونوندا دئمه‌لييم بئلنچي اينسانلاريميزا سايغي گؤسترملي‌ييك و اونون شانينده اولان بير مزارليق تيكيب، هئچ اولماسا آدينا بير خيياوان ياراديب، هئيكلين پاركلارا قويمالييل
http://ishiq.net/?p=1478قايناق : اورمونون ديرلي و جوان شاعيري حسين واحدي
گؤنده ر
بؤلوم لر:
تورك ديلي